ون ڈے کرکٹ ورلڈ کپ2023 میں ہاٹ فیورٹ بھارت کو شکست دے کر میدان مار لیا
بھارتی شہر احمد آباد کے نریندرا مودی سٹیڈیم میں کھیلے جانے والے ون ڈے کرکٹ ورلڈ کپ2023 کے فائنل میچ میں بھارتی ٹیم کی بیٹنگ لائین کی بری طرح ناکامی کے بعد باؤلنگ میں بھی جادو نہ چل سکا، آسٹریلیا نے بھارت کا 241 رنز کا ہدف 43 اوورز میں 4 وکٹوں کے نقصان پر با آسانی حاصل کر لیا۔
آئی سی سی کرکٹ ورلڈ کپ 2023ء کے فائنل میچ میں آسٹریلیا نے بھارت کو 6 وکٹوں سے شکست دے کر چھٹی مرتبہ ورلڈ چیمپئن کا ٹائٹل اپنے نام کر لیا۔
https://x.com/ICC/status/1726270959273808265?s=20
کرکٹ ورلڈ کپ2023 2023 میں دونوں ٹیموں کی کارکردگی کا جائزہ
ورلڈ کپ 2023ء میں بھارتی ٹیم لگاتار 10 میچ جیت کر ناقابل شکست تھی جبکہ آسٹریلوی ٹیم اپنے ابتدائی 2 میچ ہارنے کے بعد اگلے 8 میچز جیتنے میں کامیاب رہی۔
بھارت اور آسٹریلیا کی ٹیمیں ورلڈ کپ میچز میں 15 بار آمنے سامنے آئیں جن میں سے 9 میں کینگروز نے میدان مارا جبکہ 5 میں جیت بھارت کے حصے میں آئی، ورلڈ کپ 2023ء کے لیگ مرحلے میں بھی بھارت نے آسٹریلیا کو 6 وکٹوں سے شکست دی تھی۔
آسٹریلیا کی ٹیم نے 8ویں بار جبکہ بھارت کی ٹیم نے چوتھی بار میگا ایونٹ کا فائنل کھیلا، آسٹریلیا اور بھارت کی ٹیمیں 2003ء کے ورلڈ کپ کے فائنل میں بھی آمنے سامنے آئی تھیں جس میں کینگروز نے 125 رنز سے کامیابی سمیٹی تھی۔
آئی سی سی کرکٹ ورلڈ کپ 2023ء کی انعامی رقم
انٹرنیشنل کرکٹ کونسل کی طرف سے کرکٹ ورلڈ کپ2023 فائنل میچ جیتنے والی ٹیم کیلئے 40 لاکھ ڈالرز کی بڑی انعامی رقم دئ جائے گی جبکہ فائنل ہارنے والی ٹیم کو 20 لاکھ ڈالرز بطور انعام ملیں گے۔
ورلڈ کپ 2023 فائنل کے دوران فلسطین کا حامی نوجوان گراؤنڈ میں آگیا
آئی سی سی کرکٹ ورلڈ کپ2023 فائنل میچ کے دوران فلسطین کے حامی نوجوان نے میدان میں جاکر ویرات کوہلی کو گلے لگالیا۔
احمد آباد کے نریندر مودی کرکٹ سٹیڈیم میں کھیلے جارہے میچ کے 14ویں اوور میں فلسطین کے حامی نوجوان نے بھارتی بیٹر ویرات کوہلی کو لگے لگا لیا، جس کی تصویر سوشل میڈیا پر تیزی سے وائرل ہورہی ہے۔
https://x.com/lav_narayanan/status/1726175781272121658?s=20
تماشائی سیکیورٹی اہلکاروں کو چکما دیکر میدان میں داخل ہوا، جس نے فلسطینی پرچم والا ماسک پہننا ہوا تھا جبکہ ٹی شرٹ پر ’’فلسطینیوں پر بمباری بند کرو‘‘ کا نعرہ درج تھا۔ اس تماشائی کا تعلق آسٹریلیا سے بتایا جارہا ہے۔
تماشائی کے میدان میں آنے کی وجہ سے کھیل کو کچھ دیر کیلئے روکنا پڑا، بعدازاں سیکیورٹی اہلکاروں نے نوجوان کو گرفتار کر لیا ہے۔